IN GOD WE TRUST
CreamLoops nagbibigay ng malaking tulong sa esports ng PSAA
Malaking tulong ang ibinibigay ng CreamLoops sa esports matapos makipagtambalan sa Philippine Schools Athletic Association (PSAA) para sa kauna-unahang esports competition ng school-based league sa ikalimang season nito sa susunod na buwan.
SPORTS
10/8/20263 min read
Malaking tulong ang ibinibigay ng CreamLoops sa esports matapos makipagtambalan sa Philippine Schools Athletic Association (PSAA) para sa kauna-unahang esports competition ng school-based league sa ikalimang season nito sa susunod na buwan.
May kabuuang 16 na koponan mula sa walong miyembrong paaralan ng PSAA ang maglalaban-laban sa Mobile Legends: Bang Bang. Nakatakdang simulan ang torneo sa Nobyembre 11, matapos ang basketball season ng liga.
Ang unang esports event ng PSAA ay nakikita bilang isa pang mahalagang hakbang sa patuloy na pagsisikap ng asosasyon na palawakin ang sports program nito at mabigyan ang mga student-athlete ng mas maraming pagkakataong makilahok sa mga umuusbong na sports, habang pinananatili ang balanse sa pagitan ng pag-aaral at palakasan.
Para sa CreamLoops, higit pa sa brand exposure ang partnership. Itinuturing ng kumpanya ang esports bilang isa pang paraan upang masuportahan ang mga kabataang atleta at makatulong sa pagpapaunlad ng grassroots sports.
“Masaya at proud kami na ma-organize ang esports para sa PSAA. Ilang taon na rin kaming sumusuporta sa esports at palagi naming hinahangaan ang mga student-athlete na disiplinado at responsable, at kayang pagsabayin ang kanilang pag-aaral at sports,” pahayag ni CreamLoops Marketing Manager Pamela Ann Abril sa ginanap na “Usapang Sports” ng Tabloids Organization in Philippine Sports, Inc. (TOPS) sa Philippine Sports Commission Conference Room.
Ayon kay Abril, nais gamitin ng CreamLoops ang patuloy nitong paglago upang mabigyan ang kabataan ng mga pagkakataong mapaunlad hindi lamang ang kanilang kakayahan sa sports kundi maging ang disiplina, pagtutulungan at pagiging responsable.
“Ang aming mga produkto ay nagbibigay ng energy, at ipinagmamalaki naming maiugnay ang aming kumpanya sa pagpapaunlad ng sports, lalo na sa grassroots level. Nais naming maging bahagi ng isang environment kung saan maaaring makipagkumpitensya, matuto at umunlad ang mga kabataang atleta habang patuloy na nagsusumikap sa kanilang pag-aaral,” ani Abril.
Partikular na pinili ng kumpanya ang Mobile Legends: Bang Bang para sa PSAA competition dahil kinikilala nito ang lumalaking popularidad ng esports sa mga estudyanteng Pilipino at ang potensiyal ng organisadong paglalaro bilang plataporma para sa disiplina, teamwork at pag-unlad sa kompetisyon.
“Pinili namin ang Mobile Legends: Bang Bang kaysa sa ibang esports events dahil ito lamang ang game na hindi konektado sa gambling,” dagdag ni Abri sa ingguhang forum na suportado ng Philippine Sports Commission, Behrouz Persian Cuisine at Pocari Sweat.
Bawat paaralan ay magpapadala ng tig-anim na manlalaro, kung saan lima ang sabay-sabay na lalahok sa bawat laban. Layunin ng format na mahubog ang teamwork at strategic play, habang binibigyan ang mga estudyante ng pagkakataong maranasan ang mas organisado at kompetitibong environment ng esports.
Naglaan din ang CreamLoops ng malaking prize package upang higit na mahikayat ang mga batang kalahok. Ang kampeon ay tatanggap ng ₱100,000 cash at CreamLoops products, habang makakakuha naman ng ₱50,000 ang runner-up at ₱30,000 ang third-place finisher.
Malugod namang tinanggap ni PSAA founder at sports organizer Fernando “Butch” Arimado, na siya ring nagtatag ng National Youth Basketball League, ang partnership at inilarawan ito bilang malaking dagdag-suporta sa batang asosasyon.
“Malaking bagay po ang sponsorship ng CreamLoops sa esports at sa PSAA. It will further boost our effort to reach out to more schools outside the established leagues like the UAAP and NCAA. Talagang tumutulong sila sa kabataan at sa development ng sports,” ani Arimado.
Ayon kay Arimado, ang pagsasama ng esports sa programa ng PSAA ay nagbibigay ng panibagong dimensiyon sa liga at maaaring makatulong upang makahikayat pa ng mas maraming paaralan at estudyante sa lumalawak na school-based league.
Kasama nina Abril at Arimado sa TOPS forum sina CreamLoops Campaign Manager Racel Santos, Event Director Keith Christina Valler, at Believe, ang pinakabagong P-pop sensation sa bansa at brand ambassador ng kumpanya.
Ayon kay Abril, nakikita ng CreamLoops ang esports bilang isang makapangyarihang plataporma upang makaugnayan ang kabataan habang hinihikayat silang linangin ang mga pagpapahalagang higit pa sa larangan ng kompetisyon.
“Ang esports ay hindi na lamang tungkol sa paglalaro. Ito ay tungkol sa teamwork, disiplina, strategy at pagiging responsable. Ito rin ang mga pagpapahalagang nais naming malinang ng mga kabataan sa kanilang pag-aaral at personal na buhay,” ani Abril.
Dagdag niya, umaasa ang CreamLoops na mahihikayat ng partnership nito sa PSAA ang mas maraming kumpanya na mamuhunan sa mga programang nagbibigay ng oportunidad sa mga batang atleta. Danny Simon
Address:
Raedang International Builder and Developer, Inc.
#81 Andamiro Bldg. A. Santos Ave., Sucat, Parañaque City
To God Be the Glory
since 2023
Editor-In-Chief: Danny Simon
Editor: Enjel Manato ---enjel64@gmail.com