TAGUIG, MANILA BANDERA SA SBA ROUND 1 SEASON ONE

PINATAOB ng Taguig Stallions at Manila MSW Mavericks ang kanilang katunggali sa round 1 season one ng 1st Sharks Billiards Association (SBA) 9-ball Billiards pro tournament sa Sharks Arena and Sports Bar sa Quezon City.

Nagtala ng parehong 13 puntos ang Stallions kontra QC Dragons sa pinagsamang puwersa nina Rodrigo Geronimo, Demosthenes Pulpul, Michael Quinay at Bryant Saguiped habang ang Manileños ay ginapi ang Negros Occidental Pillars.

Pambato ng Manila Mavericks sina Baseth Macaibat, Jonas Magpantay,John Marido at John Albert Regalado.

Handa namang bumuwelta ng Quezon City Dragons at Negros Occidental Pillars sa second round ng ligang may basbas ng Games and Amusement Board (GAB).

Ang SBA na buwenamanong torneong pro billiards sa bansa ay inorganisa ni SBA founding head Hadley Mariano katuwang si George Ho.

Para sa dagdag detalye, mag-email sa info@sba.com.ph.