World 10 - ball Champ Pinoy Jonas Magpantay Inaabangan siya sa Indonesia

HANDA na si Jonas Magpantay, ang kasalukuyang kampeon ng mundo sa 10-ball na manlalaro ng bilyar mula sa Pilipinas,upang magpasiklab sa Indonesia para kumatawan sa bansa sa tatlong pandaigdigang palaro ng bilyar.

Ang 32-anyos na Batang Cubao ay ipinahayag ang kanyang kumpiyansa na makakapagbigay siya ng magandang pagtatanghal sa mga prestihiyosong palaro sa simula ng 2026.

"Gagawin ko ang lahat ng makakaya ko. Para sa watawat at bayan," ani Magpantay, na isang sports gem mula Bansud, Oriental Mindoro. Siya rin ay isa sa mga pangunahing tatanggap ng parangal sa gabi ng parangal ng Philippine Sportswriter Association (PSA) na nakatakdang gawin noong Pebrero 16, 2026, matapos niyang manalo sa Qatar World Cup 10 Ball noong nakaraang taon sa Doha, Qatar.

Si Magpantay ay lalaro sa Asian Pool Championship mula Enero 27 hanggang 31, 2026 sa Jakarta, Indonesia.

Kasama rin niyang sasargo sa nasabing palaro ang isa pang kampeon ng mundo na si Carlo Biado, pati na sina AJ Manas at Kyle Amoroto.

Bukod pa rito, lalaro rin si Magpantay sa Carabao International Open mula Pebrero 4 hanggang 8, 2026 sa Jakarta, Indonesia, at sa Kabupateh Semarang 9-ball Open mula Pebrero 10 hanggang 15, 2026 sa Balai Agung Dusun Semilia Bawen, Kab. Semarang, Jawa Tengah, Indonesia.

Si Games and Amusement Board (GAB) Chairman Atty. Francisco Rivera (sa kaliwa) at GAB Commissioner Angel Bautista (sa kanan) ay binati si Jonas Magpantay (sa gitna), matapos niyang manalo sa Qatar World 10 Ball Cup noong Nobyembre.